Navoiyda kuz-qish mavsumiga tayyorgarlik ishlari o‘rganildi

Ayni kunlarda Navoiy shahrida 2026–2027-yillar kuz-qish mavsumiga puxta tayyorgarlik ko‘rish maqsadida issiqlik ta’minoti tizimlarida keng ko‘lamli ta’mirlash va rekonstruksiya ishlari olib borilmoqda. Mazkur ishlarning sifatli va o‘z vaqtida bajarilishini ta’minlash maqsadida mas’ul rahbarlar tomonidan muntazam nazorat o‘rnatilgan.

Jumladan, “Issiqlikta’minoti” AJ boshqaruvi raisining birinchi o‘rinbosari Sherzod Sultonov Navoiy shahrida olib borilayotgan mavsumoldi tayyorgarlik ishlari bilan yaqindan tanishdi. O‘rganish jarayonida issiqlik tarmoqlarida amalga oshirilayotgan ta’mirlash ishlari, uskunalarning texnik holati hamda tizimning kuz-qish mavsumiga tayyorgarlik darajasi ko‘zdan kechirildi.

Shuningdek, obyektlarda bajarilayotgan ishlarning sifati, belgilangan muddatlarga rioya etilishi va mavjud muammolar yuzasidan mutasaddilar bilan muhokamalar o‘tkazildi.

Mas’ullarga aniqlangan kamchiliklarni bartaraf etish, ishlar samaradorligini oshirish hamda kuz-qish mavsumiga qadar barcha rejalashtirilgan tadbirlarni to‘liq yakunlash bo‘yicha tegishli topshiriqlar berildi.