Kuz-qish mavsumiga tayyorgarlik: issiqlik tarmoqlari yangilanmoqda

Angren shahar aholisini kelgusi mavsumda uzluksiz va sifatli issiqlik energiyasi bilan ta’minlash maqsadida “Angren shahar issiqlik ta’minoti” MCHJ tomonidan ta’mirlash va tiklash ishlari olib borilmoqda. Xususan, hozirda korxona ishchilari tomonidan “Istiqlol” va “Mustaqillik” MFYlar hududida bir qator muhim texnik tadbirlar muvaffaqiyatli yakunlandi. Ishlar doirasida “Istiqlol” mahallasidagi ko‘p qavatli uylar oldidan o‘tgan diametri 159 mm bo‘lgan eskirgan issiqlik quvurlari to‘liq yangilandi. Shu bilan birga, tizimdagi issiqlik yo‘qotilishining oldini olish maqsadida “Mustaqillik” mahallasida 40 metr uzunlikdagi quvurlar zamonaviy issiqlik saqlovchi qoplamalar (izolyatsiya) bilan o‘rab chiqildi. Bundan tashqari, tarmoq barqarorligini ta’minlash uchun mazkur mahalla hududida joylashgan turli diametrdagi (50 mm dan 150 mm gacha bo‘lgan) jami 35 ta ochib-yopish moslamalari (zadvijka va ventillar) to‘liq texnik ko‘rikdan o‘tkazilib, ta’mirlandi.