“Issiqlik ta’minoti” AJ boshqarma boshlig‘i U.O‘ktamov Buxoro shahrida markazlashgan issiqlik ta’minoti tizimini rivojlantirish va modernizatsiya qilish bo‘yicha amalga oshirilayotgan qurilish-montaj jarayonlari bilan bevosita tanishdi

Xususan, Buxoro shahrining Gulchorbog‘ mahallasi hududidagi yangi ma’muriy markazni issiqlik energiyasi bilan ta’minlashi ko‘zda tutilgan loyihani ko‘zdan kechirdi. Bu yerda trigeneratsiya texnologiyasiga asoslangan 32 MVt quvvatga ega modulli qozonxona o‘rnatilishi rejalashtirilgan bo‘lib, u orqali 29 ta ko‘p qavatli uy va 23 ta ijtimoiy soha obyekti issiqlik va sovutish tizimi bilan ta’minlanadi. Hozirda 3,27 km issiqlik tarmog‘i hamda 3,1 km sovutish tizimi tarmog‘i tortilmoqda. Bugungi kunda shaharning Turki Jandiy mahallasi hududidagi ko‘p kvartirali uylarni Buxoro shahridagi «RK-1» va «RK-2» qozonxonalari tarmog‘iga ulash ishlari ham ketmoqda. Loyiha doirasida 3,06 km issiqlik tarmog‘i tortilishi hamda 4 ta 5 MVtli (jami 20,0 MVt quvvatga teng) qozon o‘rnatilishi ko‘zda tutilgan. Bu tizim hududdagi 42 ta ko‘p qavatli uy va 22 ta ijtimoiy soha obyektiga sifatli issiqlik quvvati yetkazib berishga xizmat qiladi. Tanishuv jarayonida qurilish-montaj ishlarini sifatli bajarish, belgilangan muddatlarga qat’iy amal qilish hamda kuz-qish mavsumiga qadar obyektlarni to‘liq tayyor holatga keltirish bo‘yicha mas’ullarga tegishli ko‘rsatmalar berildi.