Shu kunlarda Respublika ishchi guruhi hududlarda bo‘lib, markazlashgan issiqlik ta’minoti hamda ichki tizimlarni o‘rganib chiqdi
Aytish kerakki, so‘nggi yillarda markazlashgan issiqlik ta’minotini yaxshilash bo‘yicha davlat byudjeti, xalqaro moliya institutlari mablag‘lari hisobidan qator loyihalar amalga oshirilmoqda. Mazkur loyihalar doirasida energiya samarador qozonxonalar, zamonaviy quvurlar va avtomatlashtirilgan boshqaruv tizimlari joriy etilyapti. Biroq ichki tizimlarning talab darajasida emasligi, uylarning issiqlik izolyatsiyasi yetarli emasligi va boshqaruvdagi muammolar loyihalar samaradorligiga salbiy ta’sir ko‘rsatmoqda.
Bugungi kunda mavjud issiqlik tizimlari quvvatidan kelib chiqib, markazlashgan issiqlik ta’minotiga ulash imkoniyati bo‘lgan ijtimoiy soha obyektlari, ko‘p qavatli uylar va ma’muriy binolar ham mavjud. Ammo ayrim hududlarda ichki tarmoqlarning tayyor emasligi, moliyaviy masalalar va texnik shartlar bilan bog‘liq muammolar ulash ishlarini sekinlashtirmoqda.
Ushbu ishchi guruhining o‘rganishlari esa muammoli masalalarga aniq yechim topish imkonini beradi.
Xususan, ular tomonidan qozonxonalar va tarmoqlar holati, qozonxonalar qamrov darajasi, ichki tizim holati, mavjud quvvatdan kelib chiqib, markazlashgan issiqlik ta’minotiga ulash imkoniyati bo‘lgan obyektlarni tarmoqqa ulashdagi muammolar chuqur o‘rganilib, takliflar shakllantiriladi.
