“Issiqlikta’minoti” AJ boshqaruv raisi Ilhom To‘rayev Samarqand shahrida fuqarolarning murojaatlarini qabul qildi

Qabul davomida fuqarolar tomonidan 10 dan ortiq murojaat kelib tushdi. Ularda asosan hududdagi issiqlik ta’minotining ichki tizimlarida olib borilayotgan ishlar bilan bog‘liq masalalar ko‘tarildi. Murojaatlarni o‘rganish va hal etish yuzasidan mas’ullarga tegishli topshiriqlar berildi.

Shuningdek, Ilhom To‘rayev Samarqand shahridagi RK-1 qozonxonasi faoliyati bilan tanishib, uning kuz-qish mavsumiga tayyorgarlik holatini ko‘zdan kechirdi. Jarayonda qozonxona uskunalarining holati va mavsumga tayyorgarlik doirasida amalga oshirilayotgan ishlarga e’tibor qaratildi.

Qish mavsumini barqaror va uzluksiz o‘tkazish, issiqlik ta’minoti sifatini ta’minlash hamda belgilangan vazifalarni o‘z vaqtida bajarish yuzasidan mas’ullarga tegishli ko‘rsatmalar berildi.